澳洲騎師柏寶上周因為祖家嘅屋企突然有事，就同馬會請咗假一個月，但換嚟佢努力儲嘅嫡系座騎就喺呢段時間付諸流水，就好似（17日）尋晚佢嫡系其中之一嘅「勝利仔」就俾祈普敦截糊成功。
而周日（21日）沙田賽事，自然就要望實有冇柏寶嘅嫡系座騎出戰，結果就有喺柏寶胯下連贏兩仗嘅「皇帝誥令」已確實出戰第4場四班1800米賽事，而且仲換咗潘頓埋身肉搏，仲見到今朝早（18日）潘頓仲好有心機摸呢匹馬作一課快跳，值得各位馬迷重視。
雖然「皇帝誥令」係南半球馬，但係上仗蘇偉賢賽後表示呢匹馬非常遲熟，仲話增程對呢匹馬更適合，希望開竅後越跑越好。但係今次又再增多200米嚟跑，唔通真係越長越有貨？