衝擊意甲、意盃同歐聯三冠王嘅祖雲達斯，周三先過頭關，喺意盃決賽以2:0輕取有主場之利嘅拉素，亦成為呢項盃賽首支享譽三連霸嘅球隊，教練艾基利賽後講到明，𠵱家劍指本來三日前應該攞到嘅第二冠──意甲，下周日將全力對付克羅托內。
贏拉素2:0意盃三連霸
邊度跌低，就邊度企番起身！三日前嘅意甲榜首大戰，祖雲達斯作客奧林匹高球場慘負1:3，俾羅馬做咗攔路虎，提早封王失敗，結果三日後喺同一地點，對住首都另一支球隊拉素，總算出番啖氣，攞番個彩，捧起今季首個盃仔。「斑馬兵團」靠丹尼爾同邦路斯喺開賽唔夠半小時內各入一球；下半場全軍退守，就算拉素點攻都好，對住呢條冇保方喺度、改由尼圖把關都一樣咁堅固嘅斑馬防線，真係無計可施。最後，祖記成功保住2:0勝局，喺艾基利麾下連續第三年捧走意盃，亦刷新自己保持嘅紀錄，共12次稱霸呢項盃賽。
今周意甲贏波即封王
艾基利賽後就鼓勵球員要維持同樣嘅精神，喺下周日全力殺敗到訪嘅克羅托內，鎖定聯賽錦標呢個囊中物，「聯賽剩番兩輪，我哋起碼要攞到一場勝仗，而對克羅托內場波就係關鍵一戰，我哋要踢出同今晚一樣嘅決心。」當然，祖記唔係冇暗湧，上輪輸畀羅馬後，雖仍然領先對方四分，但如果嚟緊一場波都贏唔到，當兩場全部和晒，而羅馬贏晒嘅話，咁就同得87分，後者因為對賽成績好啲，就會變成佢哋後上奪冠。不過，呢個機會真係唔大，連足智彩𠵱家嘅祖記奪標賠率，都熱到得番1.005倍，就知大家幾咁睇好佢哋；至於羅馬就有11.5倍，我求大俠或者買10蚊博一博。
至於對皇家馬德里場歐聯決賽，雖然下月三號先打，但如果祖記喺意甲封王一拖再拖，分分鐘備戰工作仲遲過今周喺西甲收爐嘅皇馬開始。