愛爾蘭籍騎師郭能本周六（20日），有份客串澳門氹仔馬場澳港盃賽馬日。今晚（17日）佢於第五場三班1200米夥拍霍利時馬房「育馬妙星」勝出法國五月盃，成功於造訪澳門前夕壯行色，至於「育馬妙星」季內已三捷，呢場單Win及組合獨贏A2分別派77.5及19.5元。
郭能係上屆谷草法國之夜唯一起孖騎師，當時佢贏兩場都唔係盃賽，今晚則一開紀錄就捧盃。這次賽前佢接受《蘋果》訪問，承認自己上次同程11檔發揮「育馬妙星」欠佳只得第六，結果此駒今場內移至7檔下，沿途守第五位跑來暢順自然，最終加速輕勝2.25馬位，人馬表現都好稱職。賽後其貴氣女馬主朱明雅亦有現身拉頭馬。
霍利時說：「大家都知道快活谷賽事檔位起了關鍵作用，今晚我的『喜菜』及『得其康』都排12檔輸了形勢，『育馬妙星』7檔算適中，所以賽前有一定期望。此駒很喜愛跑快活谷，但跑完今場將提早歇暑，下季轉五歲更為成熟，應有更進一步表現。」
上屆法國五月盃開出華將楊明綸與蔣嘉琦連贏，今屆則由三位外籍騎師包辦三甲。郭能贏「育馬妙星」，杜利萊策「人和家富」跑第二，潘頓操刀之「包裝奇兵」得第三名，第四名為華將梁家俊座騎「好益善」，四重彩派七萬一千幾。