見到今時今日嘅政局，唔少人都開始質疑，香港仲係咪行緊一國兩制。熟悉政治嘅馬迷，就一定記得鄧小平喺80年代講過嘅「馬照跑、舞照跳」。
呢句嘢一直影響住香港前途，而當時馬圈已經有馬名取材自「馬照跑、舞照跳」的賽駒出現，先有80年代尾兩捷「馬照跑」（已退役），90年代初則有六捷「舞照跳」（已退役），兩駒都係好馬。
其馬主天寶團體唔單止肯養馬，就連改馬名都貼近時局，識得因時制宜吸引馬迷眼球。
眨吓眼廿幾卅年已過，現役馬之中，仲有類似名稱嘅馬匹喺綠茵場上征戰，列陣今晚（17日）第七場二班1200米的「錢照收」正係其中之一。
此駒當年出道不久旋即四勝，由前年年底開始因腳患休戰長達16個月，但馬主天寶團體冇放棄，上年尾轉去人稱醫馬聖手嘅吳定強試試，如今夥拍梁家俊作復出首戰。
早幾季都有同主「錢照贏」（已退役）於姚本輝馬房用得幾盡之下，拉入吳廐執多兩場，咁睇吓「錢照收」可唔可以照辦煮碗啦？