今季英超嚟到尾聲，冠軍同降班都定晒，可以回顧一下。記得季初嗰陣，曼城同曼聯換咗領隊，被視為坐四爭冠嘅球隊，但曼城最後頂多排第三，離爭冠都有段距離，至於曼聯就連坐四呢個目標都做唔到，提前鎖定第六位，聯賽成績同雲高爾時代差唔多。
季初摩連奴（圖）嚟到曼聯，雖然外界唔敢講一定可以奪標，但都覺得聯賽前四係穩陣，但踢踢吓就發現唔對路。就算季尾唔喺聯賽放軟手腳去爭歐霸，亦唔見得曼聯有把握入前四，因為曼聯今季多次喺關鍵嘅時候失分，成日和波。摩連奴亦被揶揄唔係special one，而係one one，話佢成日踢成1:1。由莫耶斯到雲高爾，再到摩連奴；外界對佢哋能力嘅期望一個大過一個，但呢四個球季曼聯換血又換血，換完兩三轉，情況都冇大改善。其實曼聯同香港有啲似，領隊同特首都換過，但問題係換極都冇乜改變，離當初嘅輝煌仲有好遠距離。
講番曼聯，呢幾季，唔止曼聯領隊同球員，就連青年軍教練同球探都有大改變，唯一未聽過話變嘅係隊醫方面。其實曼聯呢幾季傷兵問題持續嚴重，尤其雲高爾執教下，傷兵試過超過10個，所以拉舒福特先有得上位。摩連奴已經係個出名教波少傷兵嘅領隊，亦善用老將；季初紅魔傷兵唔算多，但一到季尾，原本以為有啲臃腫嘅陣容都變得捉襟見肘。近兩季英超冠軍李斯特城同車路士管理傷兵做得非常好，好似占美華迪同馬列斯，近兩季都冇乜大傷；車路士今季更加係長期少傷兵。曼聯如果要重振霸業，真係要好好研究吓，點樣可以改善傷兵問題。
文：咖喱