在校友會演講前，同財資T閒談，知道佢以前在美資銀行工作，曾派駐新加坡9年之久，所以攞咗新加坡護照，兒子亦在新加坡出世。佢強調新加坡嘅教育升學壓力比香港還要大，考試成績唔好，就決定一生前途，因為政府會將考試分數差啲嘅學生派至職業學校，以後走勞工路線，精英學生就入「學術」路線，以後有機會入大學，當政府官及銀行家，會計師等等等。財資T話：「升學壓力喎，香港家長如未有新加坡經驗，唔駛講到咁大聲。」佢有冇一手經驗呀？財資T話：「咁就冇，因為兒子四歲時，我地就舉家回港，我轉工去第二間銀行吖嘛！」
香港為咗TSA，教育界爭論不休，學校及家長分為兩派，形成分裂局面，其實係可以避免嘅。退休校長L話，小三TSA嘅題目宜淺不宜深，宜大路不宜tricky（陰學生）路，弄成今日局面，負責出題目嘅當局，應負責任。校長L堅持TSA（現BCA）唔考唔得，否則十年後嘅香港學生水平，分分鐘大倒退！教育局嘅官員大概認同此點，所以力撐BCA，消息話林鄭已屬意資歷比較淺嘅教育局副局長楊潤雄升正做局長。而林鄭競選時傾向廢除BCA（梁振英則大力支持BCA），唔知楊潤雄如果真係做咗局長，會否完全聽晒林鄭特首之言，強迫教育局官員廢除BCA呢？做政治任命官員，隨時要打倒昨日之我，否則就要行人，睇吓美國FBI局長科米，少少對特朗普不敬，就立即丟烏紗帽，便知唔睇老細面色，後果堪虞，中外皆然！
有說香港學生在本地教育制度之下，只識考試，缺世界視野，有金錢能力家長，紛紛送子女入國際學校，希望考入英美一流大學。其實睇真啲，今天嘅年輕人因互聯網資訊發達，好學生往往對世界認識，多過左丁山一代。香港大學校友Jason Yip捨棄ibank筍工，轉往國際紅十字會工作，出入阿富汗、巴勒斯坦之事，已廣為人知。幾日前碰到一位經濟分析員，問吓佢嘅背景，原來係中大新亞經濟系校友，讀完中大哲學碩士，就考入財政司司長辦公室做經濟分析師，呢個係高薪職位，月薪與政務官差不多，但呢位校友為擴濶視野，放棄高薪，辭工去做智庫，跟住考入聯合國，今個星期去非洲盧旺達上工做經濟師。左丁山問佢人工如何，佢話：「比香港政府少一截，而且生活環境差好遠㗎，不過境界大大不同呢！」左丁山讚佢有勇氣，叫佢買多啲預防瘧疾、寨卡病，及慎防染上HIV啦。師弟話驚太多就唔敢去非洲㗎嘞，何況盧旺達！左丁山就記起1994年盧旺達大屠殺，死亡人數在50萬人以上，梗係驚啦，邊度有呢位師弟咁好勇氣！