以下對白似60年代粵語長片。不過，歷久彌新，永遠有巿場！
阿星……就係呢十年啦，都呢把年紀咯；不珍惜，連呢十年都浪費付諸東流，能否再擁十年很難說。離開公家做私家，打工仔、工字不出頭，你阿爺、你阿爸嗰代都有名言㗎！
朋友C一片好心。
阿星……有錢好置業咯，十年前你都唔細有啲積蓄啦？勸你買層樓，慢慢供，自住，或租俾人；而家供甩，做業主啦，唔使睇住啲樓價澎澎聲係咁升，皺晒眉頭！
朋友K都係一片好心。
阿星……叠埋心水，宜家宜室啦。
離婚？乜未結就諗離婚㗎？對感情對婚姻冇信心？阿邊個阿邊個都離婚關你乜事？你唔離唔得嘅咩？人生有幾多個十年？你睇吓你啲世姪仔都結埋婚生埋細路咯，你老母唔喺度，我唔理邊個理你？
阿叔對阿星一樣咁關心，當正自己屋企一部分。
阿星，我地識咗十個月咯，我又咁鍾意你，人生有幾多個十年？再等，只怕我冇得生啫（阿珍，你廿二歲咋！）
阿珍俾阿星拖吓手仔，十個月仲未租時鐘酒店搞掂，今時今日都少有咯。
阿星，不如我打本，你開店，搵到七除八折，淨賺嘅，二一分作五有乜唔好啫？黃金十年就係咁多，手快有、手慢冇，千古不移，你就珍惜呢十年啦！
肥仔世伯睇中阿星唔識偷食，扭佢合作。
阿星……人生冇幾多個十年，乜都放低；放下工作事業，放下似是而非嘅感情，放下家累，放下別人眼中期望，去旅行啦！學校畢業立即工作，一做兩個十年不止，不好運仍要多做一、兩個十年；運滯都唔知能留幾耐……雖然，HIV呈陽性都不斷有新藥對抗，已經不算世紀絕症，縱使有人樂觀認為癌症治療成功的翻發率比HIV死亡率還要高，再不把握機會，即時當機立斷，只要一個不經意肺炎殺過來，就是新藥都無力挽啦！
好友這樣勸自從驗身斷症，得咗HIV陽性反應的阿星。
一切地老天荒幾多個十年都化為烏有，生而有命至實際；冇命，十日、十小時、十分鐘也已太長！