這晚（17日）谷草早段有啲數字人生意味，頭兩場9號馬分別勝出（「澤心星」）及跑第三（「無敵劍俠」），第二、三場則由一對5號馬包辦第二口孖寶，分別為「富貴榮華」及「勝利仔」。
其中第三場三班1800米，賀賢馬房「勝利仔」夥拍祈普敦沿途守第六位左右，轉最後一個彎前開始逐漸發力，直路在中外疊越衝越勁，贏1.25馬位，人馬首度合作即大熱取勝，今場單Win及組合獨贏A1分別派32及16元。
賀賢同祈普敦都係澳洲人，兩人早前已於田草合作贏「津津樂道」，這晚在谷草攜手以「勝利仔」再下一城，從中亦錄得彼此首度聯手勝出谷戰。講開賀賢，佢馬房已經連勝四次賽事共取五Win，貫徹季尾例好成績的傳統。
五歲馬「勝利仔」出名後勁強橫，本係祈普敦鄉里柏寶嫡系座騎，但柏寶目前正在澳洲處理家事，祈普敦於是冷手執隻熱煎堆，為自己增添頭馬，而「勝利仔」自去年4月13日起，跨季共13個月內，一連10戰得4冠4亞2季全上名，忠心到冇朋友。
賀賢說：「『勝利仔』非常忠心，牠喜歡快活谷，今季初出即勝，再出跑第二只輸給其後多捷的『包裝騎士』，賽事水準根本很高，我或會安排牠趁勇跑多一場才歇暑，一切視乎馬兒狀態而定。」
第三場二至四名順序為「勁有波幅」、「海利多」及「康樂神駒」，四重彩派一萬七千幾。