雷神莫雷拉停賽期滿，今晚（17日）於谷草復出，頭場四班1000米卻唔到佢威，反而佢死對頭潘頓卻延續近期旺勢，夥拍方嘉柏馬房「澤心星」大熱食頭糊，此駒季內第13次出賽首度贏馬，單Win及組合獨贏A1分別派25.5及15.5元。
五歲馬「澤心星」對上一次贏馬，為上季首仗（2015年9月16日）夥拍雷神勝出三班谷草1200米，之後屢戰屢敗，輸到今次終在四班谷草最短途重響勝鼓，此駒在潘頓胯下藉1檔沿途前置，結果輕勝1.75馬位。潘頓個人連續贏到第五次賽事，其間共取13場頭馬，強勢保持今個月暫時日日有馬贏未斷纜。
無巧不成話，方嘉柏同潘頓本周六（20日）都有份跑在澳門氹仔馬場跑澳港盃，兩者分別出「萬馬飛騰」及「醒目名駒」，呢次「澤心星」贏馬一併幫佢哋壯行色，可謂理想不過。
方嘉柏表示「澤心星」上仗2月22日跑後，刻意讓牠有足夠休息，養精蓄銳跑今場，排1檔非常有利，潘頓充分利用檔位優勢，發揮出色，值得一讚。
頭場二至四名順序為「海之濤」、「常豐裕」及「喜菜」，四重彩派4,273元。其中「海之濤」爭奪服役第十次贏谷草1000米，結果功虧一簣屈居亞軍。