八方都寫過，由於「有人」（除咗CY仲有邊個吖）唔覺得打龍通有錯，所以唔畀民建聯周浩鼎辭職，結果建制派要搵第二啲方法撲火。
除咗解散UGL再選過，建制派同時將矛頭指向梁繼昌，話梁振英正就UGL案告佢誹謗，按理唔應該留佢喺委員會咁唔公正云云。
有民主派話呢招都好陰毒，而佢哋絕對不可以退縮，否則就會打破缺口，龍門任射。點解？有高人解構，𠵱家就話得梁繼昌一個俾梁振英告啫，點知第時CY會唔會逐個告？舉個例吖，如果某人係UGL專責委員會嘅委員，講嘅嘢唔啱CY口胃，佢只要發律師信，呢個委員就要走，咁到時咪冇乜人可以繼續留喺委員會打仗？所以堅決唔會畀佢哋郁梁繼昌，否則後患無窮。
至於點解要將洩密事件鬧大？有民主派亦話係圈套，似乎想將洩密嘅責任放晒喺現有嘅委員身上；若然要重組，則呢班人有污點唔可以再加入。
而當初民主派搵呢幾位代表入委員會，就係信佢哋喺調查UGL方面有最強作戰力；若然換馬，戰鬥力減弱，等同幫緊CY，試問點可以唔反抗到底？