賣卡通相關精品嘅Trendyland Studio約半年前舉辦兒童「卡通影城2016填色比賽」，幼兒組參賽資格係3至5歲，小學組則係6至8歲，早前公佈嘅結果，估唔到一幅獲獎作品，竟然引起網民熱議。
有人將比賽中奪得亞軍、聲稱由3歲細路填色嘅作品放上facebook，當中Marvel角色嘅顏色運用唔單止有深淺層次，仲有陰影嘅細緻位，背景更誇張，畫咗大廈同雷電等襯托，相信大家一睇到，都唔會信係出自3歲小朋友嘅手，話唔係家長作品都冇人信啩？《蘋果》問過亞軍作品細路所屬嘅學校，職員回應話校方知悉事件，指係學生家長自行報名參賽。
「畀小朋友填啲童真上去」
唔少網民發炮，質疑有關家長犯咗使用虛假文書等罪名，估唔到政府新聞網都咁識貨，佢哋嘅facebook之後都疑似「抽水」，喺出po宣傳「向海員致敬」嘅填色比賽時，仲話「留畀小朋友填啲童真上去~」。