2017世界乒乓球錦標賽將會喺五月29號到六月五號喺德國杜爾塞多夫開戰，港隊噚日朝早就喺香港體育學院會見傳媒。黃鎮廷上屆夥拍杜凱琹攞到混雙銅牌，兩個今屆繼續合作，再次衝擊獎牌。
呢對組合今屆被列為二號種籽，25歲嘅黃鎮廷認為對手實力接近，前列種籽優勢只限頭一、兩輪：「32強開始對手實力較強，要睇抽籤點，中、日、韓都不容忽視。」另外，佢係男單七號種籽，亦都會拍何鈞傑出戰男雙，目標當然係爭牌。
20歲嘅杜凱琹就讚拍檔黃鎮廷成日鼓勵佢：「以往佢會同我討論技術，今次就叫我加油，可能佢𠵱家識同女仔溝通。」杜凱琹打女單、混雙外，會同李皓晴戰女雙。
港出年首辦巡迴賽
另外，港隊總教練陳江華確認，香港出年五月24至27號會喺灣仔新伊館首辦國際乒聯（ITTF）巡迴賽分站賽事，香港對上一次搞ITTF巡迴賽賽事，已經係2006年搞總決賽。陳江華話就獎金嚟講，呢個全年有12站嘅比賽其實係ITTF轄下賽事嘅第三級別，參賽者會以年輕球員為主，想畀佢哋試吓喺主場比賽嘅滋味。