公民黨早前成班男黨員好大犧牲，話要「削肉救黨」操弗自己為黨11歲生日籌款，公民黨女將唔係無貢獻，「烈女」陳淑莊為咗個黨變埋「裂女」，因為苦練阿根廷探戈舞而搞到其中一條胸骨爆裂，仲要喺上周五正式表演前一晚先裂，啪晒止痛藥忍痛上陣，好在精神演出令大家拍爛手掌，咁嘅犧牲都好值得嘅！
需6星期癒合
八方噚日喺立法會見到Tanya，都算精神奕奕，但查實係痛在心，醫生同佢講要6個星期自然癒合，即係未來6星期要繼續做「裂女」。佢話𠵱家「坐咗唔想起身，起身唔想坐番」，打嗝、瞓覺或轉身、推門時份外痛楚。佢笑稱去睇醫生時，醫生問佢點整親？佢惟有畀條練舞片醫生睇解釋，醫生睇完都忍唔住笑。
原來今次拋個身出嚟跳舞籌款，係佢自己諗，話晒佢曾經靠表演搵食。佢話經朋友介紹，搵到當晚同佢一齊跳嘅partner男導師教佢，前後學咗只有10粒鐘，就要上場表演咯。細個學過芭蕾舞同中國舞嘅Tanya，資質唔差，老師都話佢其實可以學得深入啲，但時間不足惟有學基本功架娛賓，都會考慮「深造」探戈㗎。
李八方