近日香港最花生新聞，相信係日本製麵公司傳出有意用10億收購香港嘅米線舖，唔好講小弟攀龍附鳳，呢間米線舖第一間舖就喺小弟屋企附近，十幾年前仲睇到三哥喺舖前表演蘭州拉麵，估唔到當年小弟經常幫襯嘅小店，𠵱家已經值10億。正如共患難易，共富貴難，米線舖發跡後反而引起兄弟不和，分裂出「苗僑偉」同「綠仔」兩間米線舖，各有各做，日本公司就傳出想買綠仔，如果成功之後，又會唔會喺東京街頭食到懶肉、墨演10小辣烏冬呢？
創業難，守業更難；哥迪奧拿（圖）曾經被人捧到上天，小弟一向對佢評價一般，係就係幫巴塞隆拿贏六冠王，不過其實佢承繼咗列卡特嘅豐富遺產，踢走瘀血朗拿甸奴同迪高，畀美斯上位就一帆風順，而且佢嘅買人決定就真係笑話，收購伊巴謙莫域送伊度奧畀國際米蘭，真係超級大儍仔。嚟到拜仁慕尼黑，講真以拜仁人腳，拎德甲就真係最低消費，佢亦始終幫唔到拜仁贏歐聯，都算係失敗之作。
嚟到曼城，以比歷連尼留低嘅人腳，阿古路、大衛施華、奇雲迪布尼、史達寧等等，本身已經超晒班，球會仲畀多億幾鎊佢買人，加埋加比爾捷西斯、利萊辛尼、史東斯等等，拎唔到一、兩個冠軍都唔好見人啦。或者哥帥喺西甲、德甲威慣，唔知英超實力有幾接近，玩輪換玩變陣成日出事，好地地有個赫特又唔用，去巴塞挖個「黃大仙」哥迪奧巴禾返嚟，如果唔係佢因傷提早收「咧」，曼城保唔保得住前四都成問題。曼城今季四大皆空，哥迪奧拿好歹都應該保得住前四，不過佢應該好好反省一下，唔好再將以往嘅成功，嚟掩飾近年嘅失敗。
文：牽牛