教育局局長吳克儉雖然已經冇得留低，但仍然日日新鮮，惹嚟唔少噓聲；好似噚日立法會大會，教育界議員葉建源就爆吳局長「醜出國際」，呢頭話想香港主辦教育國際峯會，嗰頭又唔覆主辦單位兼no show。
OECD追問 局長冇覆
國際教學專業會議（ISTP）由經濟合作暨發展組織（OECD）主辦，事緣主辦單位曾經向葉建源追問局長去向，葉當然好奇發生咩事，對方就答，吳局長原來喺2015年提過希望香港可以舉辦2017年ISTP大會，主辦單位聽到都好期待，但係之後問過吳局長好多次，都係冇回音，最後局長仲連2016年ISTP都唔蒲頭。葉建源鬧爆吳局長影衰香港，搞到冇咗一次舉辦國際學術盛事嘅機會。
不過教育局聲稱一直同OECD保持溝通，仲話上年1月已通知對方唔出席，對葉建源嘅指控表示遺憾㖭；計八方話齋，最簡單咪公開番吳局長當日日程，睇下有咩重要得過出席ISTP？最關鍵嘅係，究竟局長有冇覆搞唔搞2017年ISTP？可惜，八方同OECD一樣，都係得唔到回覆。