為咗趕上網絡時代，香港天文台都即將開設facebook，同大家互動。想個fb多人睇兼多人like，當然要取經，喺特首選舉中網絡戰出神入化嘅曾俊華團隊，自然係台長岑智明打主意嘅首選。
岑台長噚日就出po，提及「兩位高人與我們分享社交媒體經驗」，睇番吖，岑智明本身都係歷任華人台長中最年輕上任嘅一位，喺港大理學院主修物理同數學，2014年仲連任世界氣象組織航空氣象學委員會主席，仲有邊啲人喺佢心目中份量咁高呢？有圖有真相！原來係薯片叔前政治助理羅永聰以及前新聞秘書王永傑。
原來呢兩位薯片競選辦核心，日前就同佢哋分享咗特首選戰時運用社交媒體嘅經驗，高級科學主任李立信都有捧場，仲同佢哋嚟個大合照。睇佢哋嘅笑容，應該滿載而歸啦！