醫管局噚日舉行研討大會，除咗唔同嘉賓醫生作主題演講，每年八方都好期待行政總裁梁栢賢（PY）個開幕致辭，因為實會有驚喜。結果PY今年追上創科熱，變身醫管局「小智」，係呀，寵物小精靈嗰個，帶大家探索未來醫療數碼隨身科技發展，預測未來隨身嘅智能佩戴用品同手機App等，可能隨時提供好似餐廳食物如菠蘿包嘅營養價值，即時畀埋健康貼士等，佢仲ps咗張全家福，有齊PY媽、PY爸、PY仔、PY女，望清楚啲，一家大細都係佢個樣。
小智仲揭露醫管局電腦系統嘅驚人之處，話現時系統存有嘅資料高達280TB，1TB等於850萬張紙，等於1萬棵樹。
7.5萬個員工正服務330萬名病人，平均每分鐘有63個病人睇緊病，電子病歷系統每秒有20個數據交流。𠵱家醫管局已經有唔同手機App同臨床電子系統，佢話會繼續發展。