熱血公民鄭松泰舊年喺立法會議事廳倒插國旗區旗，唔止惹嚟建制派狙擊，仲俾警方落案起訴。案件噚日第二次喺東區法院提堂，泰博繼續單槍匹馬上庭，冇請律師。佢同裁判官解釋，話呢單案範疇比較特別，自己要再諮詢法律界朋友意見，睇下搵邊類律師代表先至好。
佢話自己未準備好答辯，裁判官就話既然佢都諗住搵律師，即係準備好啦；泰博同意，表明否認所有控罪，案件下月27號預審。裁判官提佢，如果下次再用未請律師做理由申請押後，法庭未必批。
裁判官並提醒，話侮辱國旗及區旗呢啲控罪唔係當值律師計劃嘅服務範圍，建議泰博去辦事處問下，睇下有冇得酌情處理。睇番當值律師計劃網頁，列明約300多款刑事罪嘅被告可以享用服務，只要通過入息審查，再畀540蚊手續費，就會有律師幫手出庭辯護。酌情處理的確有先例，之但係如果唔批又點算呢？惟有自己課金囉。