家下呢個科技主導嘅年代，如果出街話畀人知，你唔識用電腦，都算係稀有動物！一代鞋王百麗（1880）最近獲提私有化，主要股東盛百椒噚日就自爆，佢唔識用電腦之餘，亦冇開微信（喺內地做生意冇用微信都幾罕有），佢承認，正因為咁，令公司錯失良機，遲遲轉型不成。
話晒係當年嘅新股凍資王，百麗結果因為經營表現未如理想，上市十周年，反而走去私有化，難怪盛百椒都話好感慨。唔講唔知，原來佢五一勞動節生日，剛剛65歲，以現今標準，呢個年紀唔算老，仲可以大有作為，不過佢好似冇乜信心適應時代轉變，話要自己帶領團隊走向數碼化，其實係「強人所難」，都係應該交棒畀專才去做咁話。