候任特首林鄭月娥今個月13號60大壽，八方唔知佢正日有乜慶祝活動，但原來佢喺星期一搞咗個慶功party，適逢生日咪慶祝埋，向來低調嘅老公林兆波都有現身，據報席間仲向林鄭獻吻，但八方相信林鄭收到嘅最佳生日禮物，莫過於民調顯示佢民望回升，民望淨值由負變正！
支持淨值-7變+3
有林鄭競選辦成員透露，林鄭前晚喺灣仔搞慶功宴，出席者包括競選辦主席團成員夏佳理、副主任陳振彬以及公關要員黃小珍等。林鄭以火紅連身裙登場，令唔少人眼前一亮，其後老公攞住蛋糕出場，錫錫老婆面珠登，據聞林鄭不知幾開心。在場人士除咗必不可少唱咗生日歌，亦唱埋《友誼之光》，齊心connect賀一賀。
而喺生日周，林鄭都收到一份大禮，港大民意研究計劃喺8至11日向近千市民進行嘅調查顯示，林鄭最新評分較4月當選前後升4.1分至56.7分，支持同反對比率分別為47%同44%，前者升5個百分點、後者則跌5個百分點，支持率淨值由4月時嘅負7變返正數3，增幅係10個百分點，仲唔係壽星女獲得嘅厚禮？
至於特首梁振英，卸任前未見迴光反照，最新支持度較兩星期前微跌1個百分點至25%，反對比率微升2個百分點至68%，支持度淨值係負43個百分點。按民研標準，梁振英屬於「表現拙劣」。
李八方