隔牆有耳：
迪士尼新酒店花草來自珠三角 - 李八方

迪士尼樂園全新探索家度假酒店上月開張，噚日舉行開幕禮，搵咗園境設計師介紹4個用世界唔同大洲做主題嘅花園，原來足足有成17萬棵植物咁多，仲要全部都係珠三角「本地薑」。又話帶賓客環遊世界，唔通搵笨？負責設計嘅華特迪士尼樂園幻想工程園境設計師余海恩話，酒店700種植物入面，的確好多都係選用來自非洲、大洋洲等地嘅品種，而呢啲就係佢哋嘅後代，已經適應咗本地氣候，唔會種一陣就死。而因為花期唔同，賓客一年四季都可以見到唔同景致。
八方問過樂園CEO劉永基有關54.5億擴建撥款，佢話好高興財委會終於通過，但間接承認拖太耐影響工程進度，團隊已經準備開工，希望可以彌補。

暑期設Marvel體驗區

未來樂園擴建重點除咗《魔雪奇緣》就一定係Marvel，今年暑期就有Marvel Super Summer活動。劉永基透露會好似萬聖節活動咁，喺「黑盒」展藝館搭起互動體驗，等賓客走入Marvel世界，美國隊長同蜘蛛俠更會現身同大家影相。