唔想睇大台十年如一日嘅師奶劇，其實仲有好多選擇，好似《警訊》就非常高質，最新一集為咗提醒大家高空擲物係刑事罪行，竟然用上可歌可泣嘅愛情故事作包裝，唔少網民睇完都驚嘆《警訊》嘅創作力量同幻想會嚇你一跳。
故事講述窮家女Toby同冇家底嘅尖頭仔兩情相悅，但由《警訊》首席奸角吳良榮飾演嘅Toby爸堅哥卻對女婿要求好高，堅哥知悉兩人拍拖後棒打鴛鴦，表明揀女婿嘅條件之一係有錢。此事令Toby相當煩惱，晾衫時跌咗件衫落街，喺故事中首次高空擲物。
之後堅哥向阿女介紹富二代阿明，想佢對尖頭仔死心，父女爭持不下，堅哥一怒下拎起啲嘢掟出窗，點知第一下就掟中企喺樓下嘅尖頭仔，第二下就掟中阿明，結果兩人瞓咗喺地，生死未卜。
八方一來驚嘆堅哥百發百中外，亦對《警訊》以曲到圓手法呼籲唔好高空擲物，非常佩服。