36歲嘅車路士隊長泰利，踢埋今季就會離開效力咗22年嘅車仔，星期一對屈福特嘅英超聯賽，係佢第716次為車仔披甲，亦好可能係尾二一次喺史丹福橋球場比賽。結果今季上陣機會唔多、自從舊年9月以來第一次喺聯賽正選嘅泰利，開賽22分鐘為車仔打開紀錄，今季開齋兼且係連續第17季喺英超有波入。不過泰利喺對方開波之後只係35秒，居然喺冇壓力之下解圍失誤，將個波頂後時頂咗去畀屈福特嘅伊天卡普爾，伊天卡普爾當然唔客氣將個波頂入，幫屈福特追成1:1平手。
呢頭入完波嗰頭就失誤助攻畀對方球員，網民對泰利嘅反應好一致，喺Twitter度唔少人都話佢有入波又有助攻，表現唔錯，利物浦名宿加歷查更加話「呢個moment泰利係最佳球員」，認真搞鬼。