隔牆有耳:鼎鼎要上工聯會電腦班 - 李八方

隔牆有耳:
鼎鼎要上工聯會電腦班 - 李八方

特首梁振英透過周浩鼎修改立法會調查佢收取UGL公司5,000萬嘅研究範疇,鼎鼎竟然將原裝word檔案交畀立法會,結果俾人睇晒修改紀錄,成為笑柄。

學將word檔轉pdf

八方問過立法會資訊科技界議員莫乃光,佢話一般嚟講,如果唔想俾人知道點樣改過份文件,只要將文件由word檔轉為pdf檔,就唔會有修改嘅痕迹,佢仲話坊間有唔少機構有搞呢類點樣用word嘅基本電腦課程㗎,例如工聯會。
八方上過工聯會業餘進修中心網頁,發現真係有電腦課程叫做「Acrobat PDF電子文件製作」,教授學員將word檔轉成pdf檔,下月16日就開班。成個課程460蚊,5個半鐘,鼎鼎一個月嘅議員人工,足夠讀200次有多。工聯會立法會議員麥美娟被問到呢個課程時笑笑口話,工聯會嘅課程向來好受歡迎,歡迎在職人士多啲進修,為自己增值。