候任特首林鄭月娥銳意打破梁振英敵我分明嘅政治局勢，組班時嚟個大和解，除咗盛傳招攬民主黨大腦羅致光做局長，亦有指佢會邀請民主思路召集人湯家驊（圖）出任行會成員。
本身為資深大律師、走中間路線嘅湯大狀似乎對加入行會冇乜抗拒，噚日佢出席電台節目被問到會否加入行會時直指，「如果有人認為我個專長係可以幫得到特區，作為一個社會一分子，當然應該考慮」，認為有泛民背景嘅人士加入行會，作用比司局長更大，指行會成員係「海濶天空」咁向特首提意見，司局長可能只係專責某個範圍。
已退出公民黨嘅佢話當年創黨都係以執政為目標，希望有建設地影響施政，唔可能一直做反對派，認為行會需要更改集體問責制，指有啲黨抗拒入行會，因為一入行會就一定要撐政府，等於「賣咗個黨畀你」，建議擴大豁免範圍，容許行會成員可以根據選民意願投反對票。