尚捷（8183）上市，可以話係本年最勵志、最有教育意義嘅故事。
成班管理層都係捱世界捱出頭，例如主席兼行政總裁陳永啟，只係讀到中學畢業，之後曾經派到日本在職培訓，又繼續進修，1990年已經取得日語水平能力試一級證書（N1），湊日本客無難度嘅呢！陳永啟位助理施懿君亦都有N3。
執董吳明豪亦都係中學畢業後，讀夜校完成專上課程，亦得到簿記學1級證書，而施懿君就有2級證書。呢門簿記學，家陣已經買少見少，類似係秘書同會計嘅入門版。
尚捷做紡織產品，主要銷往日本市場，一門實業發展到上市，理應好高興，但年初第一擊就因為配售情況受監管機構查詢，問問吓就煞停上市。事隔3個多月再度招股上市，被問到延遲上市會唔會好失望，陳永啟話，明白香港金融市場監管嚴格，上市有既定程序，「唔係三幾日完成，時間長定短，我唔係好在意」，專注做好業務。