中環在線:純官女婿餐廳王國蝕錢照升 - 李華華

中環在線:純官女婿餐廳王國蝕錢照升 - 李華華

日本丸龜製麵母公司Toridoll Holdings打算收購譚仔雲南米線,網民隨即熱烈討論譚仔定係三哥好食啲,中環人就諗緊傳聞中10億元作價係貴定係平。望望上市嘅飲食股,新世界發展主席鄭家純女婿龐建貽有份嘅Classified剛公佈首季業績,蝕713萬元,但公司股價竟然靜悄悄一路升,最新市值接近16億元,難怪米線都賣10億喇。
Classified經營11間走時尚路線嘅同名西餐廳,仲有貴價嘅The Pawn同中價嘅The Fat Pig各一間。除咗龐建貽,股東仲有金山工業主席羅仲榮兒子羅揚傑與朋友黃子超。

龐建貽等人3億揸手

公司舊年7月喺創業板上市,配售價0.55元,噚日收市報3.97元,累計升幅超過6倍,創仔股算係普普通通。呢隻股都係冇乜成交,經常全日冇成交,多數一百幾十萬成交一日,但佢股價就升得好靚呀,直情可以用穩步上揚去形容,慢慢升,上周四去過4蚊高位,推動市值越來越高,龐建貽等人佔19%,有3億元在手。
可惜Classified首季生意麻麻,收入跌近三成,兩間中高檔餐廳跌得幾甘,真係受到經濟疲弱影響。3位老闆似乎要諗計改善先至可以有「錢途」喎。

李華華
mailto:[email protected]