經過118年漫長歲月，在彩虹高掛下落幕。自從喺1899年開始作為熱刺主場嘅白鹿徑球場，喺周日上演最後一戰。熱刺喺呢場英超不負球迷同咁多位歷代名宿嘅期望，以2:1擊敗曼聯，鎖定今季英超亞軍兼保持聯賽主場不敗，以球會喺英超歷來最好成績，為白鹿徑送別。
挫曼聯2:1 穩坐次席
白鹿徑球場今季後就會全面拆卸，興建新球場。經過118年，熱刺喺白鹿徑第2,620場亦係最後一場比賽，領隊普捷天奴派出強陣迎戰曼聯，開賽六分鐘就由雲耶馬頭槌建功開紀錄，到易邊後三分鐘，哈利卡尼門前搶點成功射成2:0。雖然曼聯已經放眼下星期三歐霸盃決賽，今場再次派弱陣出擊，但都唔係完全冇戰鬥力，喺71分鐘由朗尼追番球，之後後備入替嘅拉舒福特都有黃金機會但把握唔到，結果紅魔冇搞寸到白鹿徑party，熱刺開開心心贏2:1。
熱刺贏波後有80分亦鎖定今季聯賽亞軍，兩項都係球會喺英超歷來最佳成績；加上喺主場17勝兩和不敗，係繼1964/65球季以來，首次喺聯賽保持全季主場不敗，作為送別白鹿徑，呢份禮物算係夠份量。
比賽結束，刺迷情緒更加高漲，紛紛湧入球場把握同白鹿徑草皮接觸嘅最後機會，亦有球迷拆凳留念。熱刺喺下季會移師去溫布萊做主場，新球場預計會喺18/19球季啟用，不過就唔會叫番做白鹿徑咯。
作為白鹿徑派對嘅配角，曼聯領隊摩連奴就冇乜癮，事關輸波後紅魔正式宣告無緣爭前四，賽後佢都諗到記者想問乜，搶住噏一輪嘢之後話：「我哋都唔想踢英超比賽。」
月尾友賽傑志已賣兩萬飛
至於熱刺呢個月26號喺大球場同港超聯冠軍傑志踢表演賽，門票噚日開始喺購票通同各售票處發售；噚朝仲有唔少球迷冒雨去各售票處購票，連同之前率先訂購嘅約8,000飛，加埋少量內部認購，首日共售約20,000張，反應算唔錯喎。