有線寬頻旗下嘅新免費電視奇妙電視（77台）前晚開台，唔少市民投訴追唔到台，即使喺奇妙官網確認所住屋苑可以接收到，但最後仍然搜唔到台。
通訊事務管理局回覆八方，指截至噚日共收到26宗有關睇唔到奇妙電視嘅查詢及投訴，奇妙電視發言人噚日就回應話，如果觀眾搜唔到台，可以去奇妙電視網頁睇睇所住大廈或者屋苑嘅網絡覆蓋情況，如果大廈已經喺網絡覆蓋名單當中但都係收唔到訊號，就要透過大廈管業處查詢奇妙電視系統接駁嘅工程進度，發言人又為不便致歉。截稿前，奇妙電視官網公佈覆蓋2,345,809住戶。
奇妙前晚8點開台，無綫同時段嘅《學是學非》僅微跌0.2點，約少咗1.3萬觀眾人次，而8點半播出嘅《流行經典50年》就微升0.6點，大約多咗3.9萬觀眾人次，似乎奇妙開台對無綫收視冇乜影響喎。