為人父母，大抵都希望子女能一鳴驚人，所以財經界有三位「一鳴」，地產界有位張一鳴，林一鳴亦有兩位。
話說德州撲克高手蔡朝暉，早前向新世界發展（019）主席鄭家純買入國際娛樂（1009），噚日公佈入董事局兼委任一班新董事，當中一位就係林一鳴。
此林一鳴並非漢能（566）那位林一鳴。此林一鳴57歲（大過漢能嗰個），係Head & Shoulders Financial董事，2006至2009年任東方銀座（現稱嘉年華，996）執董，跟住一年任天行國際（現稱華融金融，993）首席營運總監。佢1985年畢業於英國University of Newcastle Upon-Tyne。
而漢能嗰位林一鳴只係48歲，曾任職中信證券國際、中信銀行國際、BCT銀聯集團、香港按揭證券公司、渣打銀行等，仲係上海交通大學財務工程博士。兩人背景好唔同㗎，雖然最終都係喺金融圈打滾。