意大利騎師李寶利早前講過，希望下季長期留港策騎，但如今他只得六場頭馬，成績不算標青，若要續牌的話，當然要努力搏殺，博取表現。
今朝李寶利便一早到場操馬，並親自為周三(17日)谷草第六場四班1200米的「紅星」快跳兩段共800米，晨操專家積奇指此駒收身線條吸引，走起來墜手勁力貫注，唔急唔躁，過終點後餘勢不減，保持最佳狀態。
「紅星」操完亦有動靜，只見練馬師葉楚航原來一早在機坪等候聽取匯報，而李寶利落馬後，不斷撫摸馬頭以作鼓勵，明顯非常寵愛此駒，而葉楚航、李寶利睇馬時面露笑容，似乎很滿意其進度，馬兒返倉後騎練再傾一輪才離開，可謂有晒搏殺手影。
「紅星」上仗同程谷草1200米在李寶利胯下打開勝門，4歲質新馬正開始進步，今仗班次、路程、騎師不變之餘，只比上仗多負3磅至122磅，咁好形勢，難怪葉楚航今朝咁緊張啦。