唔少明星都會撞樣，估唔到議會都有個撞樣王，八方相信佢係一路走來，始終如一地冇整過個樣，只係身形脹咗加埋眼鏡，而令佢「人見人撞」咁鬼可愛！呢位自稱撞樣撞到見慣不怪嘅議員，就係民主黨新界西立法會議員尹兆堅。佢笑笑口同八方講，估唔到議會內外，一樣「人有相似」，乜自己個樣真係咁唔特別？
其實喺2015年參加區選之時，尹兆堅已經被指同葵青石蔭選區嘅民建聯對手李世隆好似樣，同樣都係高高大大肥嘟嘟，又戴住副眼鏡，當時有白鴿黨中人仲笑稱，會唔會有街坊認錯人而投錯票？而最終阿尹係輸咗嘅……
似林健鋒定劉國勳？
點估到入埋立法會，撞樣情況仲嚴重咗？尹兆堅話入咗立法會後，分別有人話過佢似經民聯林健鋒以及民建聯劉國勳，佢個人估計，除咗身形同髮型有啲似，元凶可能係副眼鏡，「戴住副有框眼鏡，就俾人話我哋似樣」。既然身形好難變（唔通真係可以突然減磅咩），惟有改形象，佢最近索性換埋副眼鏡，希望做番「真．尹兆堅」，笑言：「希望唔會再有人話我似邊個邊個啦！」
李八方