噚日政圈俾民建聯議會新丁周浩鼎搶晒風頭，護主心切卻出醜，唔少建制派都擰頭。查實立法會另一個議會新丁，噚日亦成為議員之間嘅焦點，大家仲記唔記得熱血公民鄭松泰舊年喺立法會大會倒插國旗同區旗呢？唔少人覺得好小學雞嘅事件，最後有建制派去報警，而立法會亦同時成立調查委員會狙擊，認真高度重視。
委員會噚日舉行第3次閉門會議，主席梁美芬喺會後話呀，會發信邀請泰博等證人出席研訊，首次研訊會喺下月召開。雖然部份議員早前已經向委員會提交咗書面供詞，梁美芬話，委員會將會再邀請有關議員出席研訊。
其實泰博已經就國旗事件被控告，如果佢唔出席立法會研訊又會點？梁美芬話無論對方係咪答應出席，委員會都會根據現有證據進行研訊。