本周三晚(17日)「谷中法國之夜」，當晚除咗舉行兩場盃賽法國賽馬會盃、法國五月盃之外，場內仲有好多特備節目，包括The Swaggers「搖擺者」舞蹈團，有著名舞蹈家Marion Motin演出 。
講到法國，當然不少得法國美食，亦唔止多嚿魚咁簡單，當晚馬會提供唔少法式美酒，又有10款法式佳餚，價錢由45至90元。鍾意着靚衫的朋友更可參加「最佳法國服飾大獎」，又或者參加「閨蜜化妝舞會」。而參加法式主題自拍遊戲，有機會贏取六千元旅遊禮券。Make Up For Ever駐場化妝師將免費為觀眾髹上紅白藍三色迷你彩繪。模仿法國騎師擺出策騎甫士，最神似的參加者可贏得紅酒一支。
另一方面，馬會又請到法國騎師杜利萊同意大利籍騎師李寶利，拍片推介「谷中法國之夜」，杜利萊教大家講法文，而李寶利仲會同大家分享和法國妹Kimberley的感受。