鷹君（041）家族內訌全城鬥剝花生，希慎（014）利家都係名門望族，但就極少聽見不和爭產，噚日開股東大會，仲出現溫情一幕㖭！
股東大會通常有小股東把握機會，質問管理層派息、業務發展，甚至派咩西餅卡呢類刁鑽問題，希慎主席利蘊蓮（Irene）、財務總監賀樹人都答咗七八條。
最後一位發言嘅小股東自稱持股三十幾年，見證多位CEO上上落落，「想喺問問題前講吓自己感受」，之後就用咗成分鐘，盛讚Irene係「能幹、四平八穩、節奏明快嘅女士」，好多謝有佢坐鎮，其他公司開AGM「好普通」，Irene就唔同嘞，會喺開始投票前，花時間解釋公司業務畀小股東知道，「好透明，希望以後一路都係咁落去，成為公司culture（文化）」咁話。
讚完一輪，咁呢位長情股東問題係乜呢？可能貴人善忘，冇問到。唔緊要喇，Irene已經冧到入心，甜笑話「多謝股東」。完。