「超人」李嘉誠又有收成嘞。外媒報道，佢有份投資嘅串流音樂平台Spotify已經搵咗大摩、高盛同Allen & Co搞上市，公司打算直接喺美國紐交所上市，唔發新股集資，意味原有股東唔會被攤薄股份，又可以直接喺市場沽貨套現獲利。
Spotify舊年已經抽過水，以估值663億元，集資117億元，所以公司家陣話上市冇集資需求都幾合理。公司上月同環球達成協議，目前又同華納、SONY傾緊，事成嘅話，又為公司上市清除不明朗因素。
Spotify成立至今11年，上月話有5,000萬付費用戶，多過Apple Music嘅2,000萬。佢有唔少知名投資者，包括超人、私募基金TPG、高盛等。
超人曾經掩不住內心嘅興奮，指過去投資唔少科技公司，最賺錢係Spotify，「賺100倍至150倍」，佢呢筆利潤就快可以變現喇。