俄羅斯前網壇一姐舒拉寶娃坐完15個月「禁藥監」之後負面新聞多多，而英國《太陽報》上周六更爆料，話舒娃早前喺馬德里網賽嘅熱身賽同前男友狄美托夫表現親密，令呢位保加利亞球手嘅現任歌星女友妮歌極為不滿，更有機會結束呢段超過一年嘅戀情。
有一位匿名嘅妮歌朋友透露，38歲嘅妮歌因為太忙，而25歲嘅狄美又要周遊列國咁參加巡迴賽，所以兩人都有接近兩個月冇見面；狄美今個月四號舉行嘅馬德里網賽熱身賽期間，同2015年甩拖嘅前女友舒娃不停咬耳仔，好似有機會翻撻咁，因而令妮歌更嬲。呢位消息人士仲話：「要維持一段關系唔容易，其實佢哋早前都試過分手，不過掟煲唔掟蓋咁又一齊番，不過今次我哋呢班朋友都相信妮歌會同狄美分手。」