這天周日母親節假期，你估目前共23位外籍騎師、本地華將及見習騎師中，夾埋有幾多個有出席沙田晨課操馬？答案係一個咁大把，就係吳嘉晉。
母親當然好好好重要，但嘉晉仔事業陷危機，跑咗大半季只得兩Win，唔勤力啲點得呀？今日嘉晉仔共替六駒出跳，都來自師傅告東尼馬房，分別是「大雄圖」、「仗義執言」、「幸運馬王」、「英勇大師」、「醒目名駒」及「鴻圖飛星」，其實收咗操先同阿媽飲茶都唔遲嘅！
上述馬匹之中，「醒目名駒」會跑下周六(20日)氹仔馬場澳港盃，「鴻圖飛星」就角逐本周三(17日)快活谷二班1200米，其餘則暫無賽程。老實講，嘉晉仔有份操，唔一定有份出賽，但無論如何，「鴻圖飛星」近日操得極辣，快跳、拍跳不缺外，又彈過泥閘，季尾仍咁積極可見戰意。今次回師最首本5戰得2冠3季的谷草1200米，無論配邊個執韁，都值得重視。