已為人父嘅小小超李澤楷，噚日母親節有好節目，發揮源源不絕嘅父愛，同年輕女友拍拖周圍去。
八方噚日發現小小超一身短衫短褲優閒打扮，親自揸住架波子接載24歲港姐季軍郭嘉文。女方一身粉紅色恤衫、白色短褲、尖頭鞋，露出纖幼長腿，打扮斯文。兩人先去灣仔合和中心泊車，郭嘉文就落車買麵包。
之後小小超載女友去大潭黃泥涌峽道嘅香港木球會，臨落車時仲輕撫郭嘉文臉龐，郭一臉陶醉。兩人落車後手拖手，互攬腰肢，甜蜜滿瀉，之後一齊進入木球會會所餐廳，直至個多小時後離開，稍後兩人再到郭嘉文位於馬鞍山寓所附近，小小超停車泊在路旁，郭嘉文上樓後不久，又拿着旅行袋及狗袋返回車上。對於與女友甜蜜拍拖，小小超噚晚就以英文回覆《蘋果》：「Very sorry Am at an event with 150 of my hk and overseas insurance executives, good night.」
