幾批不同嘅中環老友，每次見面，傾傾吓總係講到一個話題，就係林鄭月娥政府組班究竟搞成點，啲老友以為左丁山乜都知，總係問左丁山有乜最新消息。其實邊度有料呀，想充炮艇都未有資格，不過最近從一個知情人士口中，略知林鄭組班幾傷腦筋，原因之一係CY 2.0呢個標籤已成禁忌，新班子要諗辦法消除梁粉色彩，深梁更是可免則免，於是乎盡量向淺藍及小部份淺黃人士入手，個「人才池」自動縮細咗，其二係即使搵到淺藍淺黃人士肯入閣，還要過北京一關呢，好似羅致光做勞工福利局局長咁，消息早已通天，到依家還是未能證實呀。
這晚與幾位新亞師兄師姐敍舊吃晚飯，退休校長L又問：「陳美齡真係做教統局局長？我個老友兼中大師弟冇得玩咯噃！」陳美齡做局長，係純粹誤會啫，競選時候，林鄭確係百忙中撥出一小時同陳美齡密談，講乜內容就冇人知。適逢陳女士有書出版，幾樣消息炒埋一碟而已。現在有御用消息報講楊潤雄副局長會升正，大概塵埃已定。講起陳美齡，左丁山突然醒起，對校長L講：「你有資格做局長喎，嗱，第一，你其實都做過本地官中校長，做過國際學校校長，熟悉本港教育制度及教師問題；第二，人地陳女士送三個兒子入史丹福，你位公子都係史丹福博士啫，你位千金就入咗牛津讀PPE，跟住在牛津讀埋法律，喺英國做律師，你直情係非常成功嘅媽咪，兼通英美教育之長，做教育局長，資格滿分爆燈！」另一位在座師姐在紐約教過書，一同附和：「上古歷史就話教育部長，教育局長要品學兼優，名重士林或是杏壇祭酒先至有資格，當今乜誰都得啦，我地美國嘅教育部長最大嘅資格係Amway創辦人新抱，富甲密芝根州，到大學主持畢業禮，俾畢業生以背脊相向！校長L淨係憑兒子在史丹福、女兒係金梅倫PPE師妹，已經有資格做呢個小島教育第一把手咯！」我地對教育局長嘅要求咁鬼低，左丁山怕都有資格，幾可悲可嘆。可惜呢，陳美齡結婚時，新郎伴郎竟然係安倍晉三，單憑此事，已經無法取得北京信任啦。講完政治八卦，講番正經，問校長L對BCA有何意見，想不到佢話：「我有份引入TSA嘅，當時羅范署長知道有小六學生唔識ABC，誓言改正，我參加一個教育考察團去美國，返來建議引入小三評核，但大前提係試題宜貼近教學，不要太深，不用操練，點知一推行起嚟，就有咁多操練問題嘅啫，我仍然係贊成有TSA㗎！假設楊潤雄呢位教育局資淺官員真係躍升做教育局長，佢又點樣向林鄭老闆解說TSA/BCA呢？教育局從來拚命為TSA護航，楊先生如何打倒昨日的我，會係一場好戲！」