【聯合事故】
【本報訊】聯合醫院爆出醫療失誤，「開漏藥」致鄧桂思肝衰竭要兩度換肝，事件延誤通報被指有隱瞞之嫌。前線醫生聯盟主席蕭旭亮稱，醫管局行政總裁梁柏賢以其中一名涉事醫生放假，作為遲遲未公佈的解釋連醫生也難以接受，「除非佢去咗北極，一啲好難聯絡嘅地方，要用衞星電話」；又指以往單一醫院內出現事故，通報機制並無問題，估計今次事件涉及跨聯網，不同醫院不同專科有關。
電子病歷系統「冇智能」
港台《城市論壇》昨討論鄧桂思事件，蕭旭亮質疑醫管局延遲公佈的解釋，「好難令人相信冇人搵到醫生，若當局有心想去做，唔會完全做唔到」。他指醫管局電子病歷系統有海量資料，不易操作，「個系統其實係冇智能……要睇之前檢查結果，要每年click入去睇，唔會好似google search咁一㩒就搵到」；加上門診每名病人僅診症5至7分鐘，只能靠上手醫生有否寫下診症摘要或記下重點，認為系統需改良，更重要是改善人手。
退休前為醫管局負責風險管理及質素保證、現為中大公共衞生及基層醫療學院臨床專業顧問雷兆輝稱，今次醫管局處理手法跟以往不同，聯合醫生發現時應即上報院長，由院長通報總部，今次明顯錯過黃金判斷時間，未即時通知家人明顯不足。
■記者嚴敏慧