候任特首林鄭月娥政綱中提到，上任後要增加教育每年經常性開支50億，即將約見教育界傾下點樣分。肥豬肉梗係多人爭，幼稚園、小學、中學、大專、特殊教育，各有訴求，邊個先可以率先拔頭籌？花生友聽聞，林鄭現階段較重視嘅係資助修讀自資學位課程嘅學生，解決自資學位學費「貴到飛起」嘅問題。
以去年為例，約2.4萬人考獲入讀八大受政府資助學位嘅要求，但大學學位僅約1.5萬個，即9千人被摒諸門外，佢哋唔少會流向副學位同自資學位嘅「市場」。𠵱家一般自資學位無劃一水平，唔少課程都徵收每年6至7萬學費，專業課程如需要實驗室等器材如護理、職業治療課程，每年學費高達逾10萬，學生如向政府申請貸款讀書，畢業後一身債。
花生友聽聞林鄭近日就此摸底，其中一個方向係以學券形式資助學生修讀自資學位。八方向教育局中人打探過，自資學位嘅學券係最容易同最快落實、亦獲教育界最支持嘅資助方式，因為錢跟人走，「收幾多人頭就收番幾多錢」，直接了當，佢哋相信有關學券係劃一金額，並且一定少於學費，即係學生仍要自資一部份，但相信已經可以減輕學生嘅負擔。
當然學券制都會衍生唔同問題，對大專院校嚟講，因為「按人頭收資助」，即以收生市場決定邊啲課程、邊啲院校「有得留低」，學生用手中嘅學券投票，日後課程勢必更加由市場（學生）主導，一啲未獲學生垂青嘅課程或者要「摺埋」，將來自資院校會唔會一窩蜂只辦一類課程，拭目以待，但好肯定林鄭想喺立法會7月佢上任後通過撥款，以便盡快落實大計。
花生友
逢周一刊出