阿仙奴星期六作客以4:1輕取史篤城，保持喺英超打入前四嘅希望，不過喺比賽期間，球場上空依然有由飛機拉住飛過、寫住「Wenger - out means out!!」嘅橫額，口吻學足英國首相文翠珊強調嘅「脫歐就係脫歐」（Brexit means Brexi），雖然球迷繼續反雲，但阿仙奴領隊雲格就話自己唔會受到任何影響。
對於再次有飛機banner叫自己走，雲格賽後話︰「我只係想集中喺足球方面，其他嘢對我嚟講都唔重要。」「教授」話自己收人工為自己所愛嘅球會做嘢，只要一日喺度佢都會盡全力，其他嘢唔會對佢有影響，佢仲話︰「我唔係政客，我喺體育圈，我熱愛育運動，我會為自己喜愛嘅嘢付出一日24個鐘。我做緊份公開嘅工作，有人認同我，亦有人唔認同，對呢啲我冇乜特別嘅意見。」
現年67歲嘅雲格，自1996年開始做槍手領隊，頭六季帶領球隊贏到兩次聯賽同英格蘭足總盃雙料冠軍，但自從2004年以來、即係過去12年只係贏過兩次英足盃冠軍。