藍鼎（582）大股東兼主席仰智慧同菲律賓總統杜特爾特有乜關係呢，點解杜特爾特訪港，會同仰智慧有私人會面嘅？
話說藍鼎本月初啱啱簽咗份無法律約束力合約，潛在收購菲律賓博彩業務，暫時仲傾緊。噚日就發新聞稿，話同杜特爾特討論喺菲律賓投資標誌性嘅綜合家庭式度假村、世界級主題公園（留意，已經比潛在收購公告多咗幾隻字）。仰智慧仲話，杜特爾特好歡迎同全力支持項目發展。
其實，由宣佈潛在收購消息至今，藍鼎股價已經累升16%，家陣單收購未傾成，又乘機搵杜特爾特握手，認真識得把握時機。
藍鼎原本喺南韓濟洲島開度假村，成250萬平方米咁大，今年會陸續開幕。舊年4月又收購咗倫敦利陛俱樂部，吸引大注額嘅賭客，生意夠晒國際化。