英超球星周薪超高，而且比起其他工種，工時又唔算長，所以唔少球星得閒冇嘢做，都鍾意賭兩手，而英媒報道，曼聯球星朗尼喺今年三月養傷期間，趁老婆高蓮帶咗三個囝囝外遊，曾經喺半夜單拖入咗曼徹斯特一間賭場，仲喺兩個鐘內輸咗50萬鎊（約500萬港元）。今次畀高蓮知道之後，肯定會被扭耳仔！
喪玩輪盤、21點
據英國《鏡報》報道，曼聯3月16號喺歐霸盃贏羅斯托夫嘅比賽，朗尼因為有傷只係喺奧脫福包廂睇波，之後就喺半夜出現喺曼徹斯特235賭場。
報道引述目擊者話，31歲嘅朗尼喺VIP房留到凌晨兩點，一直都係玩輪盤同21點，佢當時有飲啤酒但冇醉，不過，佢嘅手氣似乎唔係幾好，但係佢就本住「贏就縮，輸就谷」嘅賭仔心態，越輸就越要追，仲試過一分鐘內輸咗超過4,000鎊，賭場入面啲人見佢咁賭法都覺得好意外。
一名當時在場嘅賭客話：「朗尼賭錢好似倒水咁，注碼好大，而且又輪盤同埋21點兩邊走，而喺佢賭輪盤時，佢多數買紅色，同埋買個別號碼，不過，佢手氣唔多好，一直咁輸！不過佢係賭場大客，賭場好照顧佢，梗係啦，佢咁高薪又咁出名，賭場都唔會驚佢走數啦！」
高蓮嚴打朗尼賭錢
據報，朗尼周薪高達30萬鎊，今次輸嘅都未夠兩個禮拜人工，對佢嚟講都係好小事啫！反而朗尼要擔心嘅，係事件曝光後畀高蓮扭耳仔喇。因為喺朗尼嘅自傳中，佢曾自爆喺事業剛起步時，因為賭輸咗50,000鎊，令高蓮大發雷霆。另外，朗尼更加有「有賭未為輸」嘅心態，喺上個禮拜日，據報又有人見到佢出現喺235賭場，不過今次就冇輸咁多，只係少少哋輸咗200鎊 啫。