唔止孝順仔女噚日同媽媽慶祝母親節，廿四孝老公都會藉機同太太表達謝意。勞工及福利局局長蕭偉強噚日一朝早就喺網誌分享佢嘅家庭照，趁昨日母親節兼今日係國際家庭日，話想連同一對仔女向太太表達愛同感謝。今次係局長首度公開全家福，佢話十分珍惜每個同家人共度嘅美好時光。據聞佢唔會留任下屆政府，相信7月後有更多時間陪家人。
局長同時發表題為《母親節快樂》網誌，向全港母親送上祝福，並向無私付出愛心嘅寄養或領養家庭致敬。佢話社會福利署今年起會增加240個寄養服務名額，當中包括60個緊急寄養服務，令整體名額由現時1,070個逐步增至1,310個。幼兒照顧服務方面，2018至19年度會喺沙田區增加約100個資助獨立幼兒中心名額，為3歲以下幼兒提供全日制照顧服務。