特首梁振英呢排好風騷，皆因佢破格獲邀喺北京舉行嘅一帶一路論壇演說，以示佢獲國家主席習近平高度重視。噚日佢終於登場開腔，內容一啲都唔意外，任內無限loop嘅「超級聯繫人」一詞，當然繼續有出現，佢話香港係高度國際化嘅城市，亦係世界嘅中國金融中心，所以好有條件成為中國內地同外國之間嘅「超級聯繫人」云云，相信唔少人都聽到厭。
而喺舊詞無限loop之時，又點可以唔提大灣區呢個中央新baby？CY話香港位處21世紀海上絲綢之路其中一個戰略重點嘅核心，而呢個戰略重點，就係粵港澳大灣區嘞，指大灣區覆蓋中國11個發展程度較高嘅城市，總人口達6,600萬，有龐大同嶄新嘅機遇，而喺呢個新嘅區域合作舉措中，佢話金融服務將係香港嘅主要優勢。