華人騎師一係唔贏，一贏就打孖上，第九場楊明綸爆冷勝出啡燈馬「開心旅程」後，第十場三班1400米輪到佢師妹蔣嘉琦，以告東尼馬房「美麗皇者」一放到底，8.8倍半冷門敲響今季勝鼓，組合獨贏開A2派17.5元。呢位全港唯一出賽女騎師勇奪施文信盃，從而打破個人逾一個月頭馬荒，可謂苦盡甘來。
蔣嘉琦4月5日贏「五星特工」後一直守齋，近排陣上表現俾馬迷話佢亂咗方寸慌失失，幾乎每個賽日例入研訊室被問話。剛周三晚佢於谷草騎大熱門告東尼麾下「獻惑」起步脫腳，跟住死隊狂放，令座騎返嚟散晒，競賽董事小組直指嘉琦策騎該駒的方式，未達香港騎師應有水準。同晚嘉琦騎同馬房另一駒「變出美麗」，一入直路跌鞭亦輸埋。
今日（13日）移師沙田，蔣嘉琦原本手風都麻麻哋，先後有第三場「馬上發財」及第六場「鑽飾傳奇」搏輸做二奶，幸好佢在尾場及時扭轉乾坤，夥拍「美麗皇者」以自己看家本領放頭奠勝，力挫兩匹後追馬「新力威」及「蒙古王」建功。同日較早場次和潘頓憑「勝得威」、「勁精神」合作起孖的告東尼，加埋「美麗皇者」在內2017年首次中三元；至於「美麗」系亦繼續贏田草，谷草維持今季零頭馬。
全日五Win之潘頓尾場搏輸大熱門「新力威」做阿二，唔能夠破個人紀錄地一日六捷，可謂美中不足。啡燈馬「蒙古王」後追不及只得第三；第四名為大冷門「飛星凱旋」，四重彩派七萬二千幾。