舊年主席賽馬日全體騎師合計，成績最叻係郭能起孖，有點太公分豬肉之味！今日（13日）早段情況完全唔同，雷神停賽，潘頓即由頭場開始直落三Win，包括在頭兩場分別勝出「旺蝦王」及「揮闖」後，在第三場一班1400米麥蘊利盃夥拍告東尼馬房「勝得威」大熱掄元；後駒贏完谷草轉田草再下一城，今場單Win及組合獨贏A1分別派16.5及11元。
潘頓頭兩場連勝一對灰馬「旺蝦王」及「揮闖」，分別由蔡約翰及賀賢訓練，第三場佢為告東尼贏「勝得威」，三Win出自三個不同馬房，反映雷神停賽令佢變得線路縱橫，可以盡收天下兵器。呢位冠軍級騎師近四次賽事都有馬贏，今季頭馬彈到84場，繼續排行騎師榜第二位。
講番「勝得威」，本身係馬會第二階段超新星，上次潘頓接手即贏谷草，今場於田草完成連捷，亦是一放到底，輕勝1.5馬位，人馬合作兩次保持不敗，亦令日前騎東廐「美麗大師」屈居亞軍失落冠軍一哩賽的潘頓，可以向廐主告東尼贏馬補數。
第三場出七駒整日最少。近日出賽慌失失的蔣嘉琦，騎25倍「馬上發財」轉彎前力扣座騎在貼欄位置，惟馬少場合入直路不知何故飛出極外叠，蝕位極多。結果「馬上發財」力追不及只得第二，賽後嘉琦面對廐主苗禮德一臉慘樣，三、四名分別為「加州議長」及「飛龍駒」，四重彩派3,171元算多。