四年內，結婚生仔再生仔，兩年抱四，一雙「好」字，人稱「蜘蛛女」的鄭麗莎，四子之母，才不過31歲。兩屆包山后，又是首位世界運動攀登速度賽冠軍的華人，濃縮了的高速人生，生兒育女也捷足先登。「我目標係35歲前生夠6個！」
有理由相信，這個半工半讀又要湊B的四子之母，是個媽咪級鐵人。朝八晚十二，4個孩子，最大兩歲，3胞胎全部7個月大，「唔係講笑，真係輪流沖涼搞屙屎又一日」。她說，只有「四寶」午睡，才是她的私人時間：踩機健身練體能、出外教班為商業品牌代言賺奶粉錢。
2012年結婚，婚後4個月即生仔，生完未夠一年又懷有3胞胎。她想生猴B，幾個月無動靜，心急的她立即睇醫生，服食排卵丸，即懷了3隻馬騮仔。「屋企人同醫生都唔贊成生3胞胎，覺得危險，話不如減胎」。惟獨她堅持：一個都不能少。
「目標生夠6個」
「唔想放棄任何一個骨肉，覺得自己係運動員，有足夠肌肉支持巨肚，加上我生佢哋時仲後生」。她是退役港隊攀石運動員，習慣遇強越強，這份自信，讓她力排眾議。「𠵱家回頭睇，好彩冇事。陀佢哋的確比生頭一胎辛苦好多，經常流鼻血流牙血，小便又特別頻密」。千難萬難，3個BB早產，但都健康，一家人總算放下心頭大石。
天不怕地不怕，只是強人媽咪還是有無所適從的時候。「上個月全屋人病晒，好災難，4個BB唔同時段食藥，有啲隔早晚、有啲隔兩個鐘、有啲隔4個鐘。仲要一個要飲7支藥水，唔肯飲，𠱁到飲晒，未落肚又嘔晒出嚟」。
小病是福，鄭麗莎也有得着。「健康真係最可貴，唔一定要讀名校，最緊要健康快樂，當然最好仲要孝順父母啦」。就如她，讀書唔叻運動叻，會考只3分，她自謙謂IQ唔夠EQ搭夠，明白每個人都有強弱項。
就算做了媽咪，她說仍會繼續追尋夢想。「𠵱家都保持每日兩小時體能訓練，只要有信念，就算幾忙，一定執行到」。她計劃6月出戰泰拳比賽，8月參加亞洲健美錦標賽。就像高速運轉的摩打，成為四子之母，她也沒讓自己慢下來。「6年冇比賽，𠵱家做咗媽咪，身份唔同，但我仍然好鍾意有目標嘅感覺」。兩年抱四，但她並未夠喉，矢志要生夠半打。
■記者呂麗嬋